తెలుగు భాషా సాహితీవేత్తకు 'భాషా సమ్మాన్' పురస్కారం

ప్రసిద్ధ తెలుగు సాహిత్య చరిత్రకారులు, పండితులు, పరిశోధకులు కొర్లపాటి శ్రీరామమూర్తికి కేంద్ర సాహిత్య అకాడమీ భాషా సమ్మాన్‌ పురస్కారాన్ని ప్రకటించింది. ఆయనను దక్షిణాది నుంచి ఈ పురస్కారానికి ఎంపిక చేశారు. ఉత్తరాది నుంచి పంజాబీ పండితులు గురుదేవ్‌సింగ్‌ కూడా ఈ పురస్కారం లభించింది. ప్రాచీన, మధ్య యుగాల సాహిత్య రంగంలో వారు చేసిన విశేష కృషికిగానూ వారికి భాషా సమ్మాన్‌ ప్రకటిస్తున్నట్టుగా అకాడమీ తెలిపింది. వీరిద్దరుగాక, అకాడమీ గుర్తింపు లభించని ఆరు భాషల నుంచి మరో ఎనిమిది మందికి కూడా ఈ పురస్కారం లభించింది. భాషా సమ్మేళన్‌కు ఎంపికైన ఒక్కొక్కరికీ లక్ష రూపాయల నగదు, తామ్రపత్రం ఇచ్చి సత్కరిస్తారు.

తెలుగుభాషలో కొర్లపాటి శ్రీరామమూర్తి అరుదైన, లోతైన పరిశోధనలు చేశారు. నన్నయ, తిక్కన, ఎర్రన కాలం నాటి గ్రంథాల నుంచి నిన్నమొన్నటి వరకు వచ్చిన రచనలను పరిశీలించి రెండువేల
పేజీల పరిశోధనాత్మక పుస్తకాన్ని ఆవిష్కరించారు. చరిత్రచర్చ, చిత్రశాల, గుడిగోపురం, వీణ, సువర్ణకథలు, ప్రతిజ్ఞ, పాండవుల మెట్ట, పలనాటి వీరచరిత్ర, శ్రీకృష్ణదేవరాయలు మరియు భువన విజయము, సమత, నటన మరియు పరిస్థితి వంటి సాహిత్య గ్రంథాలు, నవలలు ఆయనకు పేరు ప్రతిష్ఠలు తెచ్చిపెట్టాయి.

తూర్పు గోదావరి జిల్లా కొర్లవారిపాలెంలో 1929లో జన్మించిన శ్రీరామమూర్తి, తెలుగు సాహిత్యంలో డీలిట్‌ డాక్టరేట్‌ డిగ్రీని సాధించిన తొలి వ్యక్తిగా విశిష్టులు. 100కు పైగా చారిత్రకపత్రాలు, మరెన్నో విమర్శలు, చారిత్రక నవలలు రచించారు. మొదటిసారిగా తెలుగు సాహిత్య చరిత్రను వెలువరించిన చరిత్రకారుడు. 'చరిత్ర-చర్చ' పేరిట వెలువడిన తొమ్మిది విమర్శనాత్మక మౌలిక పరిశోధనా పత్రాలు తెలుగు సాహిత్య చరిత్రకు కొత్త దారులు తెరిచాయని ప్రసిద్ధి. ఐతరేయ బ్రాహ్మణం నుంచి విక్రమాదిత్యుని కాలం వరకు ఆంధ్ర ప్రసక్తి, ఆంధ్ర ప్రశస్తిలపై ఆయన స్వయంగా చేసిన పరిశోధనలు అపూర్వమైనవి. ఆంధ్రవిశ్వవిద్యాలయంలో పనిచేశారు. ఎనిమిది ఎంఫిల్‌, పన్నెండు పీహెచ్‌డీ డిగ్రీలు సాధించారు. రాష్ట్రంలోగాని, దేశంలోగాని ఆయనకు తగినంత గుర్తింపు రాలేదు. భాషా సమ్మాన్‌ కూడా చాలా ఆలస్యంగానే లభించిందని చెప్పాలి. ఆయన ప్రస్తుతం విశాఖలోని చినవాల్తేరులో స్థిరపడ్డారు.